الثلاثاء، 17 مارس 2015

النور مكانه فى القلوب .. تيرارارا

دايما كانوا بيقولولنا ان الناس اللى ربنا بيحجب عنهم حاسة من حواسهم بيقوى الحواس الباقية ..
يعنى الأصم حاسة اللمس اوالشم عنده أقوى من الشخص اللى بيسمع ..
واللى مش بيتكلم حاسة البصر واللمس أقوى من الشخص اللى بيتكلم ..
لكن الكفيف طول عمرى بحس ان كل حواسه أقوى من كل البنى آدمين اللى ربنا رزقهم عيون يشوفوا بيها ..
***
لطالما كنت طفلة مريضة .. أغيب كثيرا عن المدرسة وأفوت دروس اكثر ..
اصدقاء طفولتى كانوا ادوية وعانقوا مرضى اكثر مما عانقنى اصدقائى فى حياتى ..
لا استطيع النوم إلا بعد اخذ الدواء الفلانى .. ولا استطيع استقبال الفصول الأربعة إلا بوعكة صحية تسلبنى قواى فأصبح طريحة الفراش ..
الربيع يأتى ببهجته على الجميع وبألوانه التى تبدل حال الأرض وانا دائما ما يستقبلنى الربيع ويأتى فى يده حساسية الصدر التى ورثتها عن ابى فتصيبنى كل الروائح التى تمر بجانبى بضيق نفس يقرب للأختناق ..
احببت المرض وصادقته ظنا منى انه ما يجلب تعاطف امى وخوفها الدائم على صحتى من ذرات الهواء التى تبعثر شعرى ..
احببت المرض لكنى لم احب فكرة ان اصبح كفيفة !
***
هات قماشة واربط عينيك واطفى كل الأنوار ..
جرب تعيش العمى لفترة قصيرة
اختبر بقية حواسك اللى هتحركك بدل عينيك ..
استمتع بلمس الحاجات اللى بتحبها .. ملمس التيشيرت اللى بتحبه .. سريرك .. ايد مامتك .. وشك اللى اتعودت على ملامحه لكن لو غمضت عينيك وحاولت تفتكره مش هتعرف !

جرب تاكل اكلتك المفضلة منغير ما تشوفها .. سيب لسانك يقولك شكلها ايه !
اختبر مكوناتها وارسمهم بخيالك .. سيب عقلك يستمتع بيها وينشر فى جسمك هرمون السعادة اللى هيخليك تنسى عينك المغمضة ..

خليهم يتكلموا وحس صوتهم بيكذب ولا قاصد اللى بيقوله .. الحنين اللى فى صوتهم دة بعت لقلبك حضن منغير ما تتقابلوا ولا بيداروا بيه غيابهم اللى مالوش اسباب ؟!
عرفت ترسم ملامحهم من الهمس اللى ييقولوه فى ودنك ولا كل اللى شوفته خيال ابيض واسود ؟!
الزعيق اللى بتسمعه دة وراه خوف ولا كلام مكسوف يتقال فبيتدارى ورا نبرة صوت عالية وبتهاجمك ؟!

صحى احساس اللمس فى اطراف ايديك واعرف السلام دة عايز يشدك من ايديك وياخدك لأبعد مكان عالأرض ولا عايز يحدفك فى علبة ويقفل عليك عشان تختفى من حياته ؟!
قلبك لو من اللى ربنا قال عليهم " إلا من أتى الله بقلب سليم "
فأكيد هيقولك الحقيقة ..
الكفيف بيشوف بقلبه ..

السبت، 7 مارس 2015

الموت حلو .. احيانا !

ال Deathly Hallows او مقدسات الموت اللى كانت فى الجزء الأخير فى هارى بوتر كانت واكلة دماغى فترة .. الحكاية ان كان فى جسر كل اللى بيعدى عليه لازم يموت .. وفى يوم قرر 3 اخوات انهم يعدوا الجسر وفعلا عدوه منغير مايموتوا فالموت حس انه اتخدع ومقبلش الهزيمة ويقرر يخدعهم هو .. فظهر للأخوات وقالهم كل واحد يطلب حاجة وهحققهالوا ..
الاول طلب عصاية سحرية يهزم بيها عدوه وفعلا قتله واحتفل بأنه فضل يشرب لحد ما فقد وعيه وحد سرق العصاية وقتله بيها ..
التانى طلب شئ يرجع بيه حبيبته اللى ماتت فالموت اداله حجر رجع بيها طيف حبيبته وعاش معاها يومين لحد ما اكتشف انها خيال ومش حقيقة فأنتحر ..
التالت طلب عباية يستخبى بيها ومحدش يقدر يلاقيه وهو لابسها فالموت اداله حتة من عبايته واختفى بيها سنين والموت فضل يدور عليه عشان ياخده زى اخواته التانيين بس ملقاهوش .. لحد ما الاخ التالت قلع العباية عشان يديها لأبنه فالموت ساعتها لقاه و أخده ..
***
الاخ الاول اغبى واحد فيهم ..
الاخ التانى اكثرهم بؤسا .. كان مريض بالوهم .. طيف حبيبته مصبرش قلبه انها معاه .. هى مش حقيقة .. انت بتبص لخيال افهم !
فأنتحر ..
الاخ التالت كان اكثرهم حكمة وتضحية .. لما قرر يقلع العباية ويبطل هروب شال العباية عشان ابنه .. ضحى واختار يقابل الموت اللى هرب منه سنين عشان حد بيحبه اكتر من حياته .. هو برضه اكثرهم تقبل للواقع .. هو كان عارف انه كدة كدة هيموت وهروبه شئ مؤقت ..
فربنا يعنى يلهمنا تقبل فكرة الموت ونبقى متأكدين انها مجرد بداية .. الكون مابينتهيش بعدها ! :')