"إذكريني يا حبيبتي حينما تضرب عنيكي في السما وتحسّي بالوحدة"

I'm not afraid of death; I just don't want to be there when it happens.
- Woody Allen .

من كام يوم حلمت إن ماما ماتت ، الحلم دة إتكرر كتير قبل كدة ، وكل مرة كنت بصحى مصدومة وبقوم رايحة مصحياها ، وبفضل كام دقيقة مبلّمة وبعد كدة بنفجر في العياط ..
بس المرة دي الحلم كان مختلف ، أو أنا اللي بقيت مختلفة عن زمان . زمان كان عندي بابا وماما ، ضامنة وجودهم هما الإتنين وإني هشوفهم كل يوم وإننا هنفضل سوا للأبد !
فكرة إن حد فيهم هيموت مكانتش بتيجي في بالي ، وحتى بابا اللي فضل فترة كبيرة عيان والموت في الفترة الأخيرة كان متوقع جداً ، بس برضه مكانش بييجي في بالي إنه هيموت . بس مات .
المرة دي الحلم مختلف عشان أنا معنديش غير ماما ، المرة دي الحلم مختلف عشان حياتي كانت باظت حرفياً بعد بابا ، الحلم المرة دي مختلف عشان كسرت وبوّّظت وبهدلت كل حاجة وكل حد تقريباًً بعد بابا ، المرة دي الحلم مختلف عشان أنا بقيت بخاف من الموت.
مش خايفة أموت ، ومش تشاؤم ولا حاجة بس فعلاً مباخافش لما بييجي في بالي إن هاييجي يوم هموت فيه ، بس بخاف من موت اللي بحبهم وأنا عايشة ، الحياة بالنسبالي هي الناس اللي حواليا ، عيلتي وصحابي ، الناس اللي لما إكتأبت الشهور اللي فاتوا كانوا جنبي ، وخلوني أرجع تاني ، وبقيت بقدرة ربنا ووجودهم جنبي أحسن من الأول.
بس المشكلة إني بقيت كويسة بسبب الناس اللي بحبها ، اللي عالجوني بسبب إكتئاب موت بابا اللي بحبه ،الناس اللي لو هما كمان ماتوا هفضل في نفس الدايرة ، ومع كل موت حد قريب مني هرجع تاني وبصورة أسوأ ..
مش عايزة أتشائم ، أو أقدر وقوع شئ قبل ما يحصل ، بس الرعب مابيخلصش ، والخوف بقى بزيادة.