تفاصيل بيوت .

جوايا مدينة كل تفصيلة فيها مرسومة بحروف فيها منى ..
فيها احلام منشورة فى صفحات .. مجرد حبر على ورق ..
وقالولى مرة الاحلام زى العصافير .. بتطير لو ماتحققتش ..
بس انا احلامى حبستها ، وبستمتع الحقيقة بالفرجة عليها بالكلابشات .
مليانة حيطان عليها شماعات ، كتيرة اوى .
المدينة دى مليانة بيوت كلها الوان .. حابسة فى كل بيت صورة حد بحبه .. شايلة معاه كل صورة فى خيالى من ذكرياتنا ..
بيت لجدتى .. تعويذتى اللى ماشوفتهاش بس بتطبطب عليا فى الحلم وتمشى .
وعمتو اللى كنت بحب ولادها اوى .. وكنت بحب شباكها اللى طالل على مدرسة صفية زغلول فى اسماعيلية واوسع سما شوفتها فى حياتى !
كنت بحبها تضفرلى شعرى .. وبحاول مافتكرش شكلها اما جاتلى فى الحلم بعد اما ماتت ..
بيت لجدى .. اللى مالحقش يشوفنى ..
بيت لهاجر واسراء .. بس منغير صور ليهم !
عشان قعدت ادور على صور تجمعنا طول ال8 سنين اللى فاتوا ومالقيتش .. لازم افتكر نتصور سوا لما اشوفهم المرة الجاية :')
بيت ملون رمادى ومشطوب عليه اسم صاحبه ، اللى كان صاحبى من ييجى 10 سنين كدة .
و بيت كبير اوى .. مليان اوض وبلكونات ..
فيه 28 باب وكلهم ملونين ومليانين بهجة و الطرقة بينهم مليانة براح .
وادفى بيت فيهم .. اللى لما مدينتى بتضيق عليا بلاقى الطريق مرسوم دواير وبيدلنى على سكته .. بيقولى تعالى انا هخبيكى :')
بلاقى ساعتها امى فاتحة دراعاتها و بتاخدنى فى حضنها من سكات .