الكون كله بيدور .. فوق راسى !

مش فاهمة ..
مش عايزة افهم ..
مش عارفة انا بعمل ايه ..
مش عارفة انا عايزة ايه  ..
ايه الصح ! وايه الغلط !
احنا ليه بنعمل كدة !
ليه دماغى مالهاش فيشة ؟
ليه الناس بتعرف تفصل وبتتعايش وانا بتضايق من تفاهات ؟
ليه اتفه حاجة ممكن تخلينى اعيط بس مباعيطش ؟
ليه اهتماماتى مش زى البنات ؟
ليه بسعى دايما للتغيير وانا مش عارفة الغاية منه اساسا ؟
ليه دايما بحلم انى تايهة وهربانة وبجرى من حاجة معرفهاش ؟
ليه بحلم بالهروب وعمرى ما فكرت فى مكان اروحه ؟
ليه بتكلم دايما عن الحرية والكلابشات والطيور ام جناحات ملونة وانا اول حد بيحبسنى ؟
ليه بعرف اكتب كل دة لكن ببقى تمثال فى الحقيقة ؟
ليه ممكن افضل يوم بحاله ساكتة وانا جوايا فى راديو شغال صوته اعلى من اعلى حاجة فى الدنيا ؟
ليه دايما نفسى اعرف ناس كتير بس بكون اول حد بيهرب من اللمة ؟
ليه بحب اكتب مع ان القول اسهل كتير ؟
ليه بستبعد السهل دايما واحب اتسحل فى الصعب ؟
ليه السكوت والكتمان والحب والفراق من طرف واحد والسهر والذكريات وكل الحاجات المتواربة دى بتحبنى وبحبها ؟
ليه انا مقرفة وبحب اتعب اللى حواليا ؟
ليه بفتكر ساعات انى مركز الكون والكون كله بيدور فوق راسى رغم انى ببص فى المراية وببقى شايفانى ولا حاجة ؟
ليه عدوى هو نفسى ؟
ليه بسأل كل الاسئلة دى مع ان ممكن اشوف حاجة بحبها واعملها احسن من غرس جذور الحيرة المتفرعة وملفوفة حواليا دى .. ليه ؟
حرفيا مش عارفة .