أنا إبن مين يا دادا..؟

مدونتي العزيزة..
بقالي كتير مكتبتش ، بس نشر الكلاكيع اللي جوايا بيجيب إكتئاب لناس كتير ، وبقى مُرهق جداً ، كأنك واقفة في نص ميدان بتحكي قصة حياتك لناس رايحة وجاية ومش سامعاكي ولو ركزوا معاكي فهيبقى لدقايق ، و إنتباههم هيتشد في حاجة تانية..
وحتى لو ركزوا فهيكونوا صورة في دماغهم ماتهمنيش إطلاقاً بس مش هحب أكون موجودة و متبروزة في أفكارهم جوة حاجة مش أنا ..
وأصلاً أنا مش عايزة حد يبقى فاهمني ..
دة غير إن بقالي كتير حاسّة إن أنا مش أنا ..
مش إكتئاب ، أبسلوتلي ..
بس قررت أدخل الدايرة إلى اللا نهائية وما بعدها ، وأبقى شجاعة ومازهقش من الرحلة ..
***
مدونتي العزيزة..
بعد ما كنت بتكسف أتواصل وبتلخم مع الناس في الحقيقة وبفضّل تكتكة الزراير عالشات ، بقيت فاشلة لأبعد درجة مُمكنة في التواصل إلكترونياً..
وبقيت ببص للناس في عيونهم عادي ، وبضحك ، وبحكي ، وبتكلم ، وقفشت نفسي من كام يوم بزعق ..
الصوت اللي كان بيبقى مكسوف يطلع لو حد داس على رجلي أو خبطني وعايز ميكروفون عشان يتسمع بقى بيزعق :'))
***
مدونتي العزيزة..
ساعات بصحى الصبح عايزة أبقى حلوة ..
أبقى متشافة حلوة ، والناس يقولولي إنك حلوة ، وأبص لنفسي في المراية أحس إني حلوة ..
وساعات ببقى صاحية عايزة أختفى ، تظهر دوامة زمنية ترميني في آخر الكوكب ومارجعش تاني ..
أو أنعكش شعري وأطفي النور وأشد الستاير ومحدش يصحيني ، أو أستخبى في الدولاب.
***
مدونتي العزيزة ..
إسراء وحشتني ، لسة شايفاها قريب بس إسراء القديمة هي اللي وحشتني ..
الحلوة أم عيون بتلمع وصوتها كله طاقة بتديني مُبرر أتخلى عن أفكاري في الهروب عشان نتكلم سوا وأشوفها دايماً..
إسراء الإنسانة الوحيدة في الكون اللي تقدر تجيبني لما بستخبى جوة دماغي ، وهي ماسكة إيدي بكل هدوء..
أنا عارفة إنها هترجع ، أو هنتقابل في نص الطريق نشد بعض ونرجع :')
***
مدونتي العزيزة..
عايزة أحضر حفلة مع مرعي زي السنة اللي فاتت ، ونفضل نرغي في أحلامنا اللي هنحققها قريب..
وفي أحوال البلد اللي بنقول إنها مش فارقة معانا بس بنكمل كلامنا عليها برضه..
نفسي يسافر السنة دي ، وأنا لما أسافر نتقابل ونحضر حفلة سوا تاني :')
***
مدونتي
هبطل توهة ، وهشوف حل للأفكار اللي بتجيلي كل شوية إن إحنا بنعمل إيه هنا؟ وإيه لازمة كل حاجة؟ وليه بنصحى الصبح؟ وليه بحب حاجات مابتحبناش؟ وليه الحاجات اللي بتحبنا مابنحبهاش؟ وكل الأفكار الوجودية المُراهقة اللي بتزن ساعات في نفوخي دي.
***

إبعتلي جواب وطمني ..

"The world is coming down on me and I can't find a reason to be loved."

**
بقالي كتير مابكتبش ، وبقالي كتير مابكتأبش ، وبقالي كتير حاسّة إني بصحى كل يوم لسبب أو لهدف معين مهما كان تافه بس على الأقل لاقية سبب.:))
بس سحابة الإكتئاب الشهر دة ملازماني زي ضلي ، اللي هو وراكي وراكي مهما هربتي .. لدرجة إني من يومين كنت بعيط لماما عشان فعلاً عايزة أختفي ..
مش عايزة أنزل بس بنزل ، مش عايزة أتكلم بس ماببطلش رغي ، مش عايزة أنام وأفضل مبحلقة في السقف بس بنام ، حاسّة إن دماغي هنجت منغير سبب واضح ، دماغي هنجت لمجرد التهنيج عشان أقوم قايلة ستوووب .. أنا مش عايزة أكمل .. نزلوني هنا على جنب أنا هروّح لوحدي .. كالعادة ..
**
مصطفى إبراهيم لما قال ..
"لللأسف من صُغر سني علتي بزهق قوام
كل فترة أسخن لكني بعد فترة أبرد أوام
كُله في الأول بميل له وكله في الآخر بمله
حتى لو كان شئ فاضله خطوة واحدة عالختام"
كأنه بيقصدني ..
وأنا زهقت من إني بزهق ..
وعمالة أقنع نفسي أكمل للآخر ..
وإني كبرت ، مش لازم ٢٣ سنة تانيين يعدوا عشان أعرف إني مش صغيرة ..
وإني لازم أبطل أصُد الناس ..
وإني عادي مُمكن أتحب يعني زي الناس ..
مش كائن فضائي أنا.
#بلالا