فكروها

ام كلثوم بتقول ..
" واللى جوة القلب كان فى القلب جوة . . روحنا واتغيرنا احنا إلا هو !
هو نفس الحب واكتر . . هو نفس الشوق واكتر . . "

حب

الشكر موصول لأرواحهم جميعا .. لهؤلاء المبهجون الذين يغيرون شكل وجهك فى ثوانى ، ويبدلون حالك البائس دون ما يشعروا .
للذين يتقبلوا مزاجيتك ومزاحك السخيف .
لهؤلاء الذين يعتنون بالزهور التى نمو بداخلك ويرعونها بكل حب .
الشكر موصول لمنة .. ميما الصغيرة اللى معرفش ازاى بتعرف تشوفنى كدة .. مرايتى الحلوة اللى طيفها اخف من اخف حاجة خلقها ربنا .
لنشوى .. حبيبتى .. رفيقة الدرب والعيش السخن وكوكيز الارافة .
لهاجر واسراء وسمر .. اللى مهما هنبعد هنفضل نقرب بسبب الشرايط المربوطة فيونكة ملونة فى ايدينا .
لأمانى .. الصغننة ام ضى نوره زى قوس قزح وقت المطر .
لأمنية .. السمكة الملونة اللى بتنور ضلمة المحيط .. نمليتى اللى بحبها .
لفاطمة .. ام يارا .. رغم ان لقانا بقى قليل بس هى دايما موجودة معايا .. هى ويارا نجمتين بيلمعوا وسط نجوم مطفية .. هى اللى ضحكتها بتفرحنى .
لبسنت .. المبهجة اللى لخبوا وشخبطوا على الوانها من سنة فاتت .. بس هما مايعرفوش ان الوانها محفورة جوة روحها .
لبطة .. السماعات اللى بتحطهم فى ودانك عشان تسمع مزيكا حلوة .. بطة بقى هى المزيكا الحلوة .
وءالاء .. ام قلب اكبر من الكون .. البسكوتة الدايبة .
لرانيا.. اكتر حد ممكن يفرحك لمجرد وجوده فى حياتك .. ملهمتى .. روحها زى البلور .. بيبرق وبيعكس حلاوة روحها المستخبية .
لفيروز .. بوصلتى .. رفيقة الكفاح ..اللى روحها من اسمها .
لشروق .. اللى اعرفها من وانا عيلة ومابكبرش فى نظرها  .. صاحبتى واختى وحبيبتى الداعمة دائما وابدا .
لإيناس وسمر وعلياء و منى ورضوى .. الحاجات الحلوة اللى تفرح القلب اللى عرفتهم بسبب لمة انسان .
لمنى محيي .. ال support system بتاعى اللى مهما اتوه بتلاقينى .. فراشتى البمبى اللى بتطير فى سما عمالة تلمع .
لندى .. العصفورة القائدة فى سرب عصافير اغبيا ومش فاهمين اشاراتها اللى هتوصلهم لأحلى شجرة على الارض .. حلوة الحلوات .
لإيمان .. ايمو .. اللى عرفت فى كام شهر تبقى جزء منى وتخلينى اخرج من القوقعة ودايرتى السخيفة.. وبتوحشنى قد بحر اسكندرية اللى ماشوفتوش من عشر سنين .
لهبة الله الاميرة الهربانة من ديزنى .. احلى صدفة فى حياتى .
لسارة وميار .. شعلة الحب اللى مابتنطفيش .. المبتسمون دائما .
لدينا .. اللى وجودها فى حياتى معناه ان الدنيا لسة حلوة واننا فى امان .. البدر اللى بيكتمل طول الشهر مش بس يوم 14 .
الشكر موصول لأرواحهم اينما حلت .

علشان يشبهلها

"كان نفسه ينورلك قمره ويعملك بإيديه الشاى ، يحكيلك فى الليل حكاياته ويغنى لعنيكى بناى " .

تفاصيل مبعترة

قالولى انى اتولدت اقل من الوزن الطبيعى ..
طفلة وزنها 2 كيلو ، بس عيونها مفتحين ..
كأنى مش عايزة افوت لحظة فى الدنيا وماشوفهاش !
جيت الدنيا عيانة .. وفضل العيا صاحبى وماتفارقناش طول طفولتى . كنت ضعيفة وهشة زى ورقة الشجر فى الخريف ، بتظاهر بالقوة وانا بتكسر من اقل حاجة زى البسكوتة الغرقانة فى كوباية شاى بلبن .
***
نظرت لى امى ذات يوم ثم قالت ..
"منذ رأيتك اول مرة عرفت من نظرة عينيك انك يجرى فى دمك حب الاكتشاف والتمرد .. الفضول ورفض القيود .. رأيتك تكبرين يوما بعد يوم ويكبر بداخلك الحب المطلق للحرية ..
لا تحبى النصائح ولا التعليمات .. برغم تشييدك لأسوار عالية تسجنى روحك بداخلها لكنك تحلقى خارج اسوارك بأجنحة لم يكتمل نموها بعد ..
وعندما تلتقى بأسطورتك ستكتمل اجنحتك و ستكسرى القوانين اكثر من اى وقت مضى ،
انت اجمل نعامة رأيتها تطير رغم انك لا تمتلكين اى اجنحة ! " .
***
وانا عندى 10 سنين الدكتور قالى ان اتولدت بعيب خلقى فى الشبكية هيخلينى البس نضارة طول حياتى .. فكرة النضارة كانت سخيفة بس وجع عينى كان اكبر من سخافتها فلبستها ..
كان عندى طول نظر .. ورغم انى ماكونتش بشوف تفاصيل الحاجات القريبة إلا انى كنت بحب اشوف منغير النضارة .. لحد ما بقى لقبى ام اربع عيون وبقوا يندهونى بيه فى المدرسة فالهيبة اللى قعدت ابنى فيها اتهدت بسبب نضارة غبية فقلعتها !
***
كنت اختبئ من خوفى بشجاعة مزيفة .. واختبئ من ضعفى بقوة اتصنعها وقت ما اريد وامام من اريد ..
وكنت اخبئ يدى تلك التى تريد سحبك من يدك واخذك للمكان الذى احبه بوضعها فى إحدى جيوبى .. كنت اختبئ من نظرات عينى التى تتلهف لرؤيتك خلف عدسات نظارتى !
نظارتى التى كانت تصبح عديمة الفائدة فى حضورك لأن رؤيتك تجعل بصرى اوضح بكثير .
نظارتى التى تخليت عنها وتركت عينى حالها يزداد سوء لأنك قلت ان شكلى بدونها افضل . فأنضم لما فى الشبكية وطول النظر شئ جديد وهو اﻷستجماتيزم !
***
داخلة على 22 سنة بأحلام جديدة ، وناس غير اللى كنت فاكرة اننا عمرنا ما هنفترق وافترقنا . وناس عمرى ما كنت اتخيل انى اعرفهم لكن بقوا جزء من حياتى .
هتم 22 سنة وانا متحررة من كلابشات كتير ووانا خايفة من حاجات اكتر . هتم 22 سنة وانا اخف بكتير من زمان و وانا رامية ورايا ذكريات متعبة مباقيتش اتضايق لما افتكرها .
هتم 22 سنة بس لسة عاملة زى ورق الشجر فى الخريف وساعات ببقى ضعيفة زى البسكوتة الدايبة فى كوباية شاى بلبن .
هتم 22 سنة وانا لابسة النضارة تانى بعد ما بقيت بتوه لما اشوف تفاصيل كتيرة ، رجعت البس النضارة تانى والمرة دى مفيش سبب هيخلينى اقلعها مهما كان . ولسة بستخبى ورا إطار عدساتها الإزاز .
***

365 وجع

"قولوا لها انى اسكن روحها ، ولم افارقها ابدا منذ رحيلى . "

اتدرين وقت ان اخترقت الرصاصة جسدى .. لم اشعر بشئ !
كنت اريدهم فقط ان يدعوا روحى ترحل بسلام .. فصخبهم وصياحهم كان يشوش على شكل وجهك فى خيالى الذى كنت احفظ ملامحه منذ ان جئت إلى الدنيا ووجدتك بجانبى فى كل لحظة .
عندما تجرد قناصى من انسانيته وضغط على الزناد كنتى اول من شعروا بى وسمعتى صوتى ينادى عليكى رغم انى لم انطق بشئ .. فقط نطقت الشهادتين فى سرى وصعدت روحى لخالقها .
مرت امام عينك كل ذكرياتنا سويا .. يوم ولدت ورأيتنى لأول مرة .. يوم نطقت اسمك .. اول يوم فى المدرسة .. يوم مرضت ولم تبارحى مكانك بجانبى إلى ان انخفضت درجة حرارتى .. وكل يوم تأخرت فيه ولم تهدأ جفونك إلا عندما وصلت المنزل بسلام بفضل دعائك .. يوم ان نجحت فى الثانوية العامة ودخلت الجامعة .. فى كل يوم طبختى لى المكرونة بالبشاميل ورأيتى فى عيونى لذة تذوق أكلك الذى لطالما ونستنى رائحته وانا صاعد على درج المنزل .. ويوم رأيتى عيونى ترقص من الفرحة مع صوت رسالة معينة على هاتفى وعرفتى منها انى وقعت فى الحب !
ابنك الصغير الذى لازلتى تقلقى عليه كلما تأخر كبر وقلبه صار يدق ويشعر ببهجة عند رؤيتها ..
صديقك الصغير الذى كان يحكى لك مغامراته واحلامه كأنه "بيتر بان " كبر وصار يتلهف للقاؤها ..
تشبكين خيوط الأحلام الوردية لليوم الذى سأتزوج فيه ، و تتلهفين لليوم الذى سوف تحملين فيه ابنى او بنتى .. احفادك !
اعرف انهم حرموا قلبك من الفرحة يوم زفافى .. ومن رؤية احفادك لكن لو تتخيلى شكل الجنة التى سوف تجمعنا .. لم تخطر على قلب بشر !
اراكى كل ليلة عندما تسرقين لحظات فى سريرى .. او عندما لا يكون احد بالمنزل وتنامى عليه .. وتبكى على وسادتى التى طالما بكيت عليها وانا صغير .. لا اريد منك الحزن ابدا .. لا اريد لوجهك الجميل ان يتخلله العبوس . وقلبك البرئ هذا لا اريد لنار الفراق ان تذيبه . فقط ابتسمى وتذكري ابتسامتى .
سوف نلتقى مجددا فى الجنة .. وقتها اريد ان القاكى باسمة .. فاتحة لذراعك الذى حرمونى منه منذ عام بأكمله .. اريد ان اعانقك بعدد الايام التى تركتك فيها ..
احبك .
لطالما كنت احبك .
#قولوا_لها
#امى
#الذكرى الاولى
#محمود_العطار

الحب هو ان تفقد السيطرة بإرادتك احيانا ، ورغما عنك دائما .

فقد

وقت عرفت الخبر لم اعرف ماذا يمكن ان يقال فى مثل هذه اللحظة ..
لكنى الآن استطيع ان اقول لك ، شعرت كأنى فقدت إحدى عيونى !
***
- عمتو .. ممكن تحفظينى الفاتحة !
- عايز تحفظها ليه ؟
- عشان اقراها معاكى ولما اكبر تجوزينى الننة الصغيرة دى ..
***
كنت اعشق فكرة اننا نتنفس هواء نفس الوطن .. و سعادتى كانت تتمثل فى تواجدنا فى مكان واحد .. اى ان من الممكن ان تكون ذرات الهواء هذه مرت بقلبه اولا ثم جاءت إلى لتدخل رئتى شئ منه ..
ان تلك الاغنية سمعناها اول مرة سويا .. ان تلك الاحلام رسمناها سويا ..
اننا تواجدنا فى كل لحظات الفرح والحزن ، النجاح والفشل ، الامل واليأس .. سويا !
لم تزورنى الوحدة ابدا وعندما كانت تدق بابى كان طيفه يأتى إلى .. يبتسم .. وينشر بهجته فى المكان ويأخذ الوحدة ويذهب وهو يعدنى ألا ينقطع طيفه ابدا .
***
- انا بحبك وهتجوزك على فكرة ! -
لم يخطر ببالنا فى لحظة اننا سنفترق..
لا اعرف متى حدث هذا !
من اين ظهرت تلك الفتحة الدودية التى اخذت ما بداخل قلبه للجزء الآخر من المجرة ؟!
اين ذهب طيفه وبهجته وابتسامته التى أميزها ولو كان وسط ملايين البشر ؟!
اين اختفت رائحته التى كانت تملأ كتبى وحقيبتى واصابعى وقت السلام ؟!
متى انطفأت لمعة عينيك ، تلك التى كنت ابحث عنها دائما عندما يخفت نور قلبى ؟!
متى سحبت كل اعوامك من عمرى وتركتنى خاوية من كل شئ عدا ذكرياتنا معا ؟!
***
- ايه الاخبار طمنى !
- الاخبار عندك انتى .. حلمتى بإيه السنة دى ؟ بشرينى قبل ما يتصلوا بيا ويقولولى النتيجة ..
- ماتخافش .. زى كل سنة ..
واقف مع نفس البنت بشعرها الاسود الطويل المضفر وكنت متغاظة كالعادة .. بس المرة دى كانت لابسة نضارة :))
- يبقى خير : )
***
امتلأت بالذكريات ولم يعد بداخلى اى مكان لذكريات جديدة ..
احتاج سنوات بعدد التى قضيناها سويا لأشفى منك ..
لكى اعود فارغة من كل الماضى الذى خلفته وتركته وراءك .
ولماذا اخذت كل شئ وتركت الرابط الذى كان يربطنى بك ؟!
مازلت احلم بك كل سنة فى نفس الميعاد ..
مازلت عندما تبكى قبل نومك استيقظ وعيونى تؤلمنى بدلا منك ..
مازلت اشعر بالحزن عند حزنك ..
مازلت افرح عند سماع اخبار عنك ..
لكن اخبارك هذه المرة اصابتنى بحزن يعقوب ، قل لى كيف لى ان افرح وفى يدى دعوة زفافك ؟!
لن افرح بعد الآن بذرات الهواء التى تتنفسها وتدخل رئتى ، لن اكون بجانبك وقت فرحك مثلماكنت افعل .. ولن يكون لدى الحق فى مواساتك بعد الآن .. فقط اتركنى لنفسى .. احزن واثور واكسر كل اشيائى فى هدوء ..
اتركنى لنفسى اتأقلم على الرؤية بعين واحدة .. بعد تلك التى اخذتها قبل رحيلك .
وحده الله يستطيع ترميمى من جديد كما خلقنى اول مرة .
***

نص ساعة فى معهد ناصر

ضحكته من النوع اللى بيقولوا عليها بتدوب دى وبتنشر حواليك فراشات والوان حلوة ..
ضحكتله رغم ان فى العادة كنت هدور وشى واعمل نفسى ماشوفتوش .. بس يمكن الكرسى اللى بالعجل اللى قاعد عليه هو اللى خلى عينى ماتتحركش من عليه طول ماهو قدامى ..
او انابيب التنفس اللى مكلبشة الطير اللى ساكن قلبه .. او حتى شعره اللى وقع قبل حتى ما يشيب .. وعينه اللى عمالة توزع سحر فى كل مكان دى اللى اتحول لونها لأسود م العيا ..
وريحة البخور اللى معرفش جابها منين اول ما دخل وملا بيها المكان ..
ضحكتله منغير تأنيب ضمير عشان فرصة لقانا تانى شبه مستحيلة وعمر ماهيبقى فى بينا قصة حتى ولو فى خيالنا .

شتا .. 3

انا بحب لحظات الاعتراف جدا ..
ونفسى اعترفلك انى مباحبش اعترف انى بكره التعود !
مباحبش اتعود عالناس ولا اهلى ولا صحابى .. مباحبش اتعود على الاماكن .. مباحبش اتعود عالنغمات اللى بتخلى قلبى يرقص او يسرح او حتى يحزن !
مباحبش اتعود على حاجاتى وهدومى ، حتى نضارتى مباحبش البسها واتعود عليها رغم ان عينى اشتكت منى خلاص :'))
لما حاجة بحبها بتسيبنى وتمشى قلبى بيصيبه حزن يعقوب !
واكتشفت ان هروبى دايما هو وسيلة الدفاع اللى بدافع بيها عن نفسى لما ببقى عايزة ارمى كلابشات التعود ..
بخاف طعم اول مرة يروح من كل حاجة بحبها .. بخاف حلاوة اللقى تختفى فببعد ومابسألش .. بخاف ريحة الشوارع تتبخر فبغير طريقى دايما ..بخاف التفاصيل تتعاد فبدور على غيرها .. بخاف نظرتى للحاجات تتغير فبسيبها تمشى .. بخاف اخلص الكتب عشان ماسرحش بخيالى وازهد الواقع ف مبكملهاش ..
التعود على الكتابة حتى بيخلي الكلام واقف فى حلقى ماهوش عارف يتقال ازاى وامتى .. وبيخلى حبر القلم ينشف لما مابعرفش حتى اكتب اللى انا عايزاه .
التعود بيخلق فى حياتى روتين وانا الروتين بيقتلنى وبيفتفتنى وبيخلينى شخص ممل وسخيف وروحه باهتة .. وبما انى موسوسة بالنظام والترتيب فأى خلل فى روتين اليوم ممكن يبوظلى اليوم كله !
عشان كدة اقتنعت ان مفيش مانع من حبة نعكشة وهتلاقينى بتخلى اول بأول عن اى حاجة بتلفنى فى دايرة الروتين .
المهم ..
كتير بفقد السيطرة وبتعود على حاجات وبدمنها .. وحاجات تانية بزهدها من قبل ما تيجى .. بس مصطفى ابراهيم قال مرة ..
"وازاى هزهد فى حاجات معاييش ! " .
#شتا