مدونتى العزيزة ..
عايزاكى تعرفى ان مفيش اى سبب مهما كان هيقدر يخلينى أتخلى عنك وأبطل أحكيلك .. مهما حصلى .. ومهما اتضايقت .. ومهما فرحت والسعادة خلتنى أغفل عنك .. مهما سافرت وغيبت وروحت آخر بلاد العالم هتفضلى أنتى الحاجة الوحيدة اللى بتشاركنى كل تفصيلة فى حياتى وبتسمعنى منغير لوم ولا عتاب .. منغير نصايح سخيفة .. منغير ما احتاج انى اشرحلك وابررلك اى حاجة .. فخليكى متأكدة انى بحبك .
***
مدونتى العزيزة ..
انا بحب الناس جدا !
ومش زى ما دايما بقول انى بكره اللمة والناس .. المشكلة انى بتلخبط فى وجود الناس والسبب فى دة هو طفولتى اللى كانت خالية من البنى آدمين ، ماعدا كام شخص يتعدودا على صوابع الأيد ..
بكون فى قمة سعادتى لما بيتنا بيكون رايق .. و وأنا وسط ناس بحبهم .. ووسط ناس عارفة انهم بيحبونى ..
المشكلة انى ساعات مابعرفش أبين حبى وقد ايه بكون ممتنة ليهم لمجرد وجودهم فى حياتى ولمجرد اننا بنتلاقى وبيضحكولى وبضحكلهم ..
ياريت اعرف ابعتلهم جوابات عشان الكلام ساعات لما بقوله بيتقال بطريقة هبلة فبمابيوصلش معناه اللى اقصده :))
***
مدونتى العزيزة ..
انا بحب صحابى .. كل صحابى .. اللى بنقابل كل فترة واللى بنتقابل من السنة للسنة ..
اللى شوفنا بعض مرة واحدة واللى بشوفهم كل يوم ..
اللى عارفين انى بحبهم واللى مايعرفوش ..
اللى لسانهم بيقول انهم بيحبونى واللى افعالهم هى اللى بتقول .. اللى رسايلهم بتيجى فى وقتها واللى مكالماتهم دايما عارفة الميعاد ..
الصحاب رزق .. وانا ربنا رزقنى بحب و بهجة الدنيا كلها فى صحابى ..
***
مدونتى العزيزة ..
انا مش عايزة الحب ييجى دلوقتى عشان مش مستعدة استقبله اطلاقا ..
الحب زى ما قال حمادة هلال " الحب حلو آه حلو اوى اوى " .. بس انا عارفة انه لو جه دلوقتى مش هعرف معناه ولا هعرف إزاى اتصرف فى وجوده .. عشان للأسف لسة عند رأيي ان الحب مليان قيود وانا مباحبش الكلابشات ..
الحب هيخلينى اتخلى عن احلامى وانا بحب احلامى اكتر من الحب نفسه ..
أرجوك يارب ماتبعتليش الحب دلوقتى .. انا لسة عايزة أطير ومش عايزة حاجة تكلبش رجليا فى الأرض .. نفسى جدا اكون عصفور بيحلق فى السماوات . ومش مستعدة اكون شجرة خالص دلوقتى .. مش عايزة فروع ليا فى الأرض .. أرجوك يارب :)
ليست هناك تعليقات:
إرسال تعليق