بنـت .. البنت دُنيـا .. وانتى دُنيتك هتفتحلك ابوابهـا قريب ..
سألتهـا "عرفتـى منيـن ؟! "
قالتلـى " ما هى قُدامك فى الكوتشينـة اهى ! "
لا أدرى لماذا تركتها تُكمل خرافاتها .. لكنـى جلست صامتـة  استمع اليهـا ..

2 .. ملازمـك اتنين .. وبتشوفوا بعض كل فين وفين ..
بتحبيهم وبيحبوكى .. بس بتتوهـوا من بعض فى الزحمـة .. حاسبوا على اللى بينكـوا .. ماتسيبوش الايـام تبعدكوا .. ومهمـا تبدعدكوا المسافات اتحدوهـا وقربـوا

5 .. إلتزمـى بصلاتـك .. هتمنع عنك الأذى والعيـن ..
ربك موجود دايمـاً .. افتكـريه على طول مش وقت اما تبقى فى شدة بس !

10 .. 9 ولاد وبنـت .. روحـك متعلقة بيهـم .. وهما كمان متعلقين بيكـى .. وفيه عفريـت صغير بيكملهم 11 ..
بيحيـك بس مابيقولش ! :)

1 .. دايمـاً لوحدك .. محبوسـة جواكى .. بتتنفسـى حُريـة بس قافلة على نفسك .. بتحبـى الناس والعالم بس بينكوا جدار خوف !
اتعودى على الدوشة .. فى عز دوشتـك هدوء ..

شايـب .. شعـره شاب بس قلبه التعبان مفتّح زى الورد .. بتحبيـه اكتر من روحـك .. وعمرك ما قولتيله ولا عمرك هتقولى !
بيشـوف فى عنيـكى حلمه .. وبتشوفى فى عروق ايديه طريقـك .. بس عُمرك ما بتنسى ان عُمره ما عرف يشوف جواكى .. ولا حتى بينلك انه مُهتم ..
باين من وشه انه مش فارق معـاه .. بس هو فارق !
دعوتـه ليكـى بالدنيا وما فيهـا .

3 .. بنتيـن و ولد .. هتبقى مسئولـة عنهم .. خليكـى ضلهم وملجأهم من زحمـة الدُنيا ..
خافى عليهم وحطيهم فى قلبك وعنيكى .. وإياكى تكسرى قلب حد فيهم .. ولا تسيبـى ايده فى نص الطريق .. انتـى مسئولة عنهم .. ولادك اللى ماجبتيهومش ! :)

9 .. ناقصهم واحد ويكملـوا .. بس الصبر حلو ..

جوكـر .. ست مش راجل !
هى الجوكر فى حياتـك .. منغيرها حياتـك تتشقلـب .. بينكوا رابط غريب محدش فاهمه ولا عمرهم هيفهمـوه ..
اتولدتـى من روحهـا .. انتـى نصها التانـى
دموعـك بتقتلها وانتى عارفة .. وغيابها بيكسـرك ..
كلمة منها تطلعك السمـا ونظرة بتنزلك الارض !
نفسهـا تشوفك احسن واحدة فى الدُنيا .. بطلى تخذليهـا !
بتدعيلك دايماً ربنـا يكرمك مع اللى هيسعدك .. وبتدعيله :)

8 .. بتدورى فى دواير مقفولة .. بطلى تنشفـى راسك ..
وكله هيتحل بإذنـه
فكـرى ازاى تخرجى من الدايـرة و تفتحـى طريـقك
وهتلاقيـه مليان فرحـة ..

ولد .. نصيبـك .. هيرسـم على وشك ابتسامـة مش هيعرف يمحيهـا الزمـن ..
بيـه هتكمل اسطورتـك .. اسطـورة الحُب اللى انكتبله يتولد ولا ينتهيـش !

"طب وباقـى الورق ؟!"

"'طرق مقفولة وضلمة هتبـقى نور "

خنقـة القاهـرة بتقتلنـى !

عايـزة اسـافر ..

 عايزة امشـى فى شوارع معرفهـاش ..

 ارجع اتوه بين الناس ..

عايزة اروح الدار .. هما الوحيدين اللى بينسونى عُمرى وبرجع عيلة بضفيرتين معاهم !

10 ولاد بينسونـى سنـى :)

و 18 غيرهم تحت "الكبار" بيخلونـى افرح اكتـر !

سعد اما بيبصلى ويضحك بعنيه الخجلانين دايمـا :)

وناجى البلطجـى اللى بيحبنى فى سره :))

كلهم على بعضهم 28 مشكلة و ضحكة بتفرح قلبـى !

عايزة اروح الحسين عشان بحس ان المكان دة اتبنى عشانى ..

عايزة اقرا الفاتحة للحسين اللى مات لوحده بس عاش "مصطفى ابراهيم"

عايزة اروح وسط البلد وفى وسط الزحمة اسمع صوت السكـوت ..

عايزة اصلى الجمعة فى السيدة زينب مع عمتو زى زمان ..

ونشرب قهوة ونتمشى فى الشوارع القديمة بتاعت زمـان ..

عايزة اروح شارع القصر العينـى اللى روحته مرة صدفة واتعلقت بيه معرفش ليه !

وحسيت ان روحى طايرة فى الماكن دة بتفاصيله ومحلاته و الحيطة اللى واقفة فى زوره بقالها سنتين !

عايزة اروح الجامعة واعدى على الدقى اللى الشوارع فيه بتخلينى افرح منغير سبب ..

عايزة ارجع امشى من محطة سعد لشارع حلوان و الفلكى وانا مبسوطة زى زمان !

عايزة اروح اسكندرية والسويس وبورسعيد .. عايزة رجلى تلمس الرملة واحس بالحريــــــــة مع نسمة هوا تلمس وشى تخلي قلبى يصغر سنة ..

عايزة احس ان ليا لازمة زى زمان .. 

عايزة ناس كتير فى حياتى .. انا حياتى بلا ناس تقريبا .. 

كلهم محطات مؤقتة . . وانا بكره العلاقات المؤقتة جدا !

عايزة لمة عيلة فى عيد او مناسبة كلهم بيضحكوا من قلبهم .. محدش شايل فى قلبه حاجه للتانى ..

كلهم قلبهم على قلب بعض ..

عايزة يهدوا عشش الحمام اللى قصادنا اللى بقت مقيده حريتى فى بلكونة بيتنا .. بلكونة بحس فيها بالحرية كل يوم قبل الفجرو الكل نايم 

السما بتحكيلى حكايات وحواديت .. برد عليها بأسرار محدش يعرفها غيرنا ..

بقالى كتير ماشربتش شاى بالنعناع الاخضر .. احمد الخضرى كل يوم يقولى بكرة هجيبلك وبينسانى :(

بحب الناس والحرية والزحمة والاماكن القديمة والابتسامة المليانة كلام والبلكونات وريحة النعناع ..

"جـوة قلب كل واحد وجع ساكت .. بيزيد لما نفتكـر دة اذا كنا اصلاً ناسيين ! "
انتبهـت للى هى بتقوله .. وبصيتلها بإهتمـام ..
كملـت وهى باصـة فى الأرض .. قالت :
بصـى .. انا هحكيلك على حاجـة حاسة انى مش هعرف اخبيهـا اكتر من كده ! .. كل ما بفتكر بتخنـق .. ومحدش بيبقى عارف مالى .. كل واحد بيحـلل سُكاتـى على مزاجُه !
اللى يقولك دى حبت واحد وسابهـا .. واللى يقول دى كان مشيها بطال بس اهلها كسروا شوكتهـا ..
بسمعهـم وبضحك !
اصل عمرى ما صاحبت ولد .. حتى فى المدرسة والجامعة معرفتش ولد ..عشان كده تحليلاتهم بتضحكنى على خيالهم الواسـع .. او المريض !
الموضوع حصل من 4 سنين .. كان عندى تمريـن بعد المدرسة .. ماما فضلت تقنعنـى عشان مانزلش .. بس انا كنت عايزة اتمـرن .. البطـولة كانت بعد اسبـوع .. والكابتن معتمد عليـا ..
عندّت معاها وفعلاً نزلت .. بس اشترطت عليا انى آخُد اختى الصغيـرة معايا .. وافقت !
رغم انى بروح التمرين كل مرة لوحدى .
روحـت .. واتمرنـت .. بس كنا فى الشتـا وكنت هموت من الجـوع و الفلـوس اللى معايـا كانت يادوب تكفى المواصلات .. بس الجوع خلانـى مستعدة اروّح مشى بس آكُل !
اشترينـا سندويتشين من الكافيتريا وأكلنا واحنـا ماشيين .. صبرنـا نفسنـا بـ لقمة فى التلج دة ..
خرجنـا من النادى لقينـا اتوبيس نقل عام هيودينـا لحد البيت .. وبالظبـط على قد الفكـة اللى اتبقت ..
فرحت انا واختـى وركبنـا .. الطريق كـان زحمـة .. السواق اتخنـق .. و اول ما وصل عند شارع هيختصرله الطريق لقينـاه قال اللى خوفت منه ..
"بصـوا يا حضرات طريق الكورنيش زحمـة و مش هيسلَك انهارده .. اللى عايز ينزل يتفضل ! "
بقينـا بين نارين .. ننزل فى المكان ده واحنا منغير ولا مليم او نكمل معاه و نروح
فى مكان مانعرفوش !
استنينـا حد يقوله ان ده مش طريقه .. بس محدش اتكلم وكل الرُكاب وافقـوا .. فـ نزلنـا !
المكان اللى نزلنا فيه كان عبارة عن ورش ميكانيكا مقفولة ومليانة شباب شكلهم غريب .. والصف التانى كلاب !
ولو لمحتـى نور تبقى محظوظة ..
بصيت لأختى وعملت شجاعـة ومسكت ايدهـا و مشينـا .. بس المكان بقى هادى فجأة .. والشباب اختفوا !
و معرفش لحسن الحظ او سوءه مفيش ولا عربيـة بتعدى تعمل حس للشـارع !
طلع من ورانـا موتوسيكـل وكان ماشى بسـرعة .. لما صوته قرّب لقيت اختـى صوتت والشباب ظهروا و حرفياً كانوا هيموتوا من الضحك !
ساعتها عرفت انهم اتحرشوا بيهـا !
حسيـت ان عقلى وقف .. بديهياً مسكت اختى بسرعة و فضلت محاوطة عليها وبقينـا نمد كأن ورانا وحش وهياكُلنـا !
اخـى بتعيط .. والنور لسة عليه كتيـر .. المحلات بعيده وشارعنـا مش باين ..
حسيت كأنى مشلولة بس دبت فيا الروح فجأة وبأقصى سرعة عندنا بقينـا نمشى ..
الموتوسيكل لف والمرة دى اتحرش بيا انا !
كنـا بعدنـا عن الشباب اللى واقفين .. بس صوت ضحكهم عمال يعلى .. صوتهم فى ودانى لحد دلوقتـى !
المحلات قربت والنور ظهـر بعد دقايق ..
الناس وشوشها باين عليها ان محدش شاف ولا سمع حاجه عشان ينجدنـا !
طلعنـا البيت وأحنا باين علينا اننا مش طبيعيين ..
ماما سألت مالكوا .. وكأنها داست على جرح مكتـوم ..
انفجرنـا فى العياط .. اخدتنـا فى حضنهـا وفضلت تعيط جنبنا وتدعـى على اللى عملوا كده !
بابا جه وماما حكتله .. سكـت !
بص فى الاكل اللى قدامه وقال :
"ما هـو لو كنتوا سمعتـو الكلام ومانزلتـوش مكانش حصل كده ! .. ما هو لو عندى ابن مكانش ده حصلكـوا ! "

تخيلـى ! .. كل اللى شغل باله اننا ماسمعناش الكلام وان ربنـا رزقه بـ بنتين بس !
كمل صدمتـى بجملـة عمرى ما هنساها ..
"انتوا اللى جبتوه لنفسكوا .. انتوا اللى بتحبوا كده ! "

مش هحكيلك عن وجعـى .. بس هسيبك تتخيلى كسرة قلبـى من كلام ابويـا.

هكتـب عنك منغير ما اخاف انك تعرف انى اقصدك ..
بطلت اخاف !

بحب الليل وسكوته وسرحـانه .. والمزيكا اللى السما بتعملها قبل الفجر ..
وكل البيـوت وهى حاضنة الناس منغير كلام .. والنجوم مرشوشة فوق البيـوت و الشوارع اللى بتنور ضلمة القلوب ..
وصوت منيـر وهو بيقول " شبابيـك .. الدنيا كلها شبابيـك .. والسهر والحكاية والحواديت .. كلها دايرة عليك " 
والذكريات اللى بتيجى فى بالك تخليك تبتسم .. او تخليك ترفع راسك للسما وتقول يارب .. 
و الستاير المقفولة .. والضوء اللى بيدخل هربان نفسه فى دفا ..
و عز النهار والزحمة لما بحس انى لوحدى .. و فى عز سكون الليل بحس انى جوة قلب كل النـاس .. إنى متونسة بـ ناس بزورهم ويوزرونى فى الحلم ..
و جدتـى اللى عمرى ما شوفتها بس بين قلوبنـا رسول .. يوم ما طبطبت عليا فى الحلم .. يومها كانت فرحى اللى زارنى .. وحواديتـى كانت مابتخلصش !
جدتـى "فرج الله" بعتتلى من اسمها شوية .. جدتـى اللى كل مرة تنده عليها او تقول اسمها .. بتُذكر اسم ربنـا ..

أقولِك على سـر ؟! حاسة انك لو اتجوزتى مش هشوفـك تـانى ..

كبرنـا واتغيرنـا وملامحنا مش زى زمـان ..
الضحكة اختفت وبقت إبتسامـة مليانـة كلام ساكـت ..
الرغى اللى كان بالساعات اتحول لدقايق .. وكل الكلام متعاد و قديـم ..
لُقانـا اختفـى وبقى يحصل مرات معدودة فى السنـة كلها !
بعد ما كنا بنقضى معظم الوقتت مع بعض .. بقى ممكن نقعد بالشهور مانشوفش بعض
الاماكن اللى اتعودنا نروحها مع بعض .. والمشى اللى بالساعات .. والفاترينـات .. والشوارع والناس .. اتغيرت !
بقيت لوحدى دايماً .. انعكاس صورتنا فى الفاترينات بقى انعكاس ليا لوحدى .. انتى اختفيتى !
مباقيتش اشتاق لشوارع وسط البلد واحنـا سوا ..

صورتها المليئة بالراحـة الذى كان يبث دفء فى روحى اختفى !
وجهها البشوش تحول لوجه عابس .. يتخلله ضحكـات مزيفة !
روحها التى كانت تبث حيوية فى كل مكـان تحول لكسـل وشرود دائم !
حاولت كثيراً إقناعها بالتخلى عن اسبابها التى جعلتها تتحول لشخص آخر .. لكنها متمسكة بها ..
عمرها الذى لم يتجاوز الحاديـة والعشرون .. تشعر وكأنه واحد وسبعون ! .. مع الفرق ان الأشخاص فى هذا العمر لديهم من الخبرة ما يكفى .. لكنها بالكاد تعرف كيف تتجنب اصغر المشاكل ..
قاربت روحها على الأنطفـاء .. ضحكتها .. كلامها .. وعيناها اللامعتين ..
أفتقدها ! .. لكن الأمل بداخلى اصابه اليأس .. فهى غير معترفة بغيابها من الأساس !
نقاشنا اصبح حاد .. وملئ بالعتـاب ..
لكنها لا تفهم انى لا اهتم واعاتب سوى من هم اقرب إلى من نفسـى .. كانت كذلك لكنها لن تعود !
مُحينا من اولويات بعضنا .. لقاءاتنا تحولت لصدفة ..
اشعر انها مسألة وقت وانى لن أراها ثانية ..
يوم زفافهـا .. سوف افرح كما لو كان زفافى .. لكنى بعدها سوف يُصيبنى حُزن يعقوب ..

ستظل ارواحنا معلقة ببعضها البعض بين جدران مدرسة قديمة .. ارواحنا سوف تلتقى بينا عيوننا لن تفعل !

الكلام فـ الضلمة زَحمة
و السكون و الصًمت رَحمة
ليه بعادَك شوكة تِلمة واقفة فـ ضلوع الزمن !
ليه مشاعري الصادقة تهلَك ,, ليه بتدفعلَك تمَن !؟
ليه وعَدت تكون سَكَن
و إنت جدرانَك شقوق !؟
ياللي بِعت سنين و شوق
فوق على ذنبَك تفوق
ليك جراحي مُقدماً
ليك فـ كُل طريق وجَع
ليك فـ كُل مكان ضباب
ليك فـ كُل مراية باهتة تلقى شَكلي فـ الغياب
ليك فـ كُل منام عذاب
ليك فـ كل سكوت حساب
كَسر قَلب البنت يجعَل فيك دُعاها مُستجاب ..ـ

حينما تُبدع #عزيزة_على .. 

هو انا لوفقدت الذاكرة هلاقى حد فاكر كل حاجه عنى ؟!

يعنى هلاقى حد فاكر ملامحى وانا صغيرة ؟! "غير ماما وبابا اكيد :D "

يعنى هلاقى شخص فاكر شكلى زمــان .. حافظ ملامحى ؟ فاكر شكل شعرى ؟

فاكر كلامى من وانا صغيرة لحد ما كبرت كان ازاى ؟

تفكيرى اتغير واتحول 100 مرة ازاى ؟

فاكر كل ذكرى اتحولت فى ثانية لـ صورة نفتكرها و تخلد احلى لحظات حياتنا ؟

حد فاكر الاماكن اللى بحبها ؟ فاكر مين الشخصيات اللى اتأثرت بيها فى حياتى ؟

فاكر اسامى صحابى من حضانة لحد دلوقتى ؟

خطواتى مش هيمحيها الزمن وهيبقى فاكر كل شئ عنى وكل مكان روحته وكل بيت حسيت جواه بـ أمان ؟!

هيبقى فاكر قايمة احلامى وازاى بالغلط اتخليت عن نصهم ؟ هيفتكر الاحلام الجديدة اللى قررت احققها قبل الـ 21 ؟

حد يبقى فاكر كل حاجه غلط نفسى ابطلها وكل حاجه صح بفرح لما اعملها ؟

للأسف .. دورت وملاقيتش !

مع فكرة ان انا وصحابى بنشوف بعض بالصُدفة .. فـ لسوء حظى لو حصلى حاجه وفقدت ذاكرتى ..

كل الماضى والحاضر هيتمحوا .. والمستقبل هيتحول لـ شئ عمرى ما حلمت بيه .. 

احلامى هتضيع .. الاماكن مش هتبقى زى ما هى .. 

ضحكاتى فى الطرقات سوف يمحيها النسيان .. و طفولتى سوف تتلخص فى ذكريات منسيــة !

اكتوبر2012 .. اول مرة اقرر اسيب احساسى يتشاف ..
يوم ما قررت اعمل Blog وابتدى رحلتى فى التعبير اللى كنت فاشلة فيه طول عمرى ..
فى ابتدائى كنت بكره مواضيع التعبير عشان مبعرفش ابدا منين !
بس اول ما ببتدى اول سطرين بلاقى نفسى كملت وساعات كلامى اللى عايزة اقوله الصفحات مابتقضيهوش ..
بس برضه كان بينى وبين التعبير حاجز من الخوف !

كل المقدمة السخيفة دى عشان انا مباقتش نفس الانسان اللى قرر يعمل Blog عشان يتعلم وصف احساسه ..
اتعلمت ازاى اقول الكلمة الصح .. فى وقت ما انا عايزاها .. وللشخص اللى انا عايزاه !
اخدت قرار انى هقول للناس اللى بحبها .. انــــــــا بحــــــــــبــــــــــكـــــــوا !
بصوت عــــــاااااااالـى يتسمع ..
و لقيت مفيش فايدة ! ..

بس فيه ناس مهما حاولت تشرح لنفسك قد ايه انت بتحبهم مش هتعرف .. حبهم اكبر من قدرتك على الوصف !


"حاسة انى متلخبطة .. ومعرفش انا حاسة بـ ايه ! لا بقيت ازعل ولا بقيت افرح ..
اشتاق لـ طفلة كانت تشبهنى !"

#حلم
نتقابل فى شارع القصر العينى صُدفة .. او فى حفلة فى الاوبرا صُدفة برضه ..
تتلاقى عيوننا صُدفة و نكتشف اننا زى بعض فى حاجات كتير ..
نتعلق ببعض .. نسيب الطيش اللى بنتشاركه يودينا مكان ما يحب !
اتعلم منك الجرأة اللى مستجبية فى عيونى .. ونضحك على اى شئ محدش فاهمه غيرنا :)
نسمع نفس المزيكا مع بعض .. نحب نفس الأكل .. مش هحس انى كائن غريب عشان على طول مكتئبة !
عشان انت برضه بتشاركنى احساس الاكتئاب .. ولو سكت مع كل الناس .. هختار الكلام معاك انت بس !
ورق الشعر مش هتخبيه فى الكراكيب وتوريهونى .. ويعجبنى وتقرر ماتخبيهوش تانى ..
ارمى الخوف ورا ضهرى واسيب قلمى يجرب الحرية فى وصف مشاعره اكتر من كده !
نروح كل الاماكن الزحمة ونحس اننا لوحدنا ! .. محدش موجود غيرنا ..
نتجنن وفى نظرنا يبقى عين العقل :)
الاماكن القديمة تبقى مُتعتنا الوحيدة والابدية .. وخصوصا مولد سيدنا الحسين :)
الشاى بالنعناع مايفارقش حياتنا .. وعود قرنفل يخلينا نصلى على النبى فى كل شفطة :)
نخترع حاجات غريبة ومحدش يفهمها غيرنا .. او نفهما للناس وكل ما يعملوها يفتكرونا ..
نبقى اسطورة الحُب اللى اتكتبله يتولد ولا ينتهيش :)

الرسالة الخيالية الاولى .. 

“Mo cuishle : “My darling, my blood.”

اهو Clint Eastwood يقولها الكلمة دى من هنا !
وانا اعيييييييييييط من هنا !
اصلا ازاى فى كل مرة اشوف الفيلم ده احبه اكتر من المرة اللى قبلها ؟!
نفسى نفسى نفسى اسمعها .. حتى لو اللى بيقولهالى هيشيل انبوبة الاكسجين اللى بتنفس منها وهموت بعدها .

لـ ماما .. حُب حياتى .. اللى علمتنى كل حاجه
لـ بابا .. اللى عُمرى ما اعترفتله بحبى وحبيته من سكـات 
لـ دينا .. اللى بتأكدلى كل يوم انها اطيب منى وان انا بظلمها كتيـر 
لـ احمد .. اللى اكدلى ان الاخ الصغير هو اكتر حد ينفع يبقى صاحبك فى الدنيا 
لـ حبيبة .. بنتى اللى على طول حاسة انى مسئولة عنهـا 
لـ هاجر .. اللى بتفهمنى من سكات 
لـ اسراء .. عشرة عُمرى اللى دايما بتقفشنى
لـ نشوى .. اللى صورنا مع بعض ليها اكتر من ذكرى تفطس من الضحك
لـ خلود .. أختى اللى على بحلم بيها وكنت بشوفها زمان اكتر من دلوقتى
للطفل الصغير .. اللى اعترفلى بحبه ونسى اسمى اما كبر
لـ عمتـو .. اللى كل مابتقولى يا "لالا" بصغر سنة
لـ شوارع الزمالك .. اللى فيها ذكريات 14 سنـة من عمرى
لـ مستر عبد الحافظ .. مدرس العربى فى 4 ابتدائى اللى معرفش ليه فاكراه لحد دلوقتى
لـ مبنى اعدادى اللى شهد على احلى سنين حياتى ولحد دلوقتى روحى متعلقة فيه
لـ مستر ياقوت .. اللى فى سنة اتعلمت منه حاجات معرفتهاش فى 18 سنـة .. اللى هفضل افتكره وادعيله طول عُمرى
لـ مستر خالد .. اللى دايما كان محسسنى انى مقصرة فى حقه وفى حق نفسى
لـ مسترعبد القادر .. اللى نظرة عينيه كانت بتخلينى اتكسف من نفسى
لـ مستر محسن .. اول حد اعتبره ابويا التانى واول حد فى حياتى اخذله
لـ كابتن خالد صلاح .. الكابتن الوحيد اللى سمعت كلامه و عرفته لمده 5 سنين ومعرفنيش
لـ عُمر طاهر .. الوحيد اللى بيوصف زحمة دماغى وبيدخل جوة قلبى يفتش فى اسرارى ويكتب عنها
لـ مصطفى ابراهيم .. صديق الاكتئاب اللى عمره ما عرفنى ولا عمرى شوفته
لـ عمى .. اللى عمرى ما حسيت انه عمى
لـ جدتى .. اللى عمرى ما شوفتها .. بس طبطبت عليا مرة فى الحلم
لـ ناجى .. اعند طفل شوفته فى حياتى .. مرايتى وانا صغيرة
لـ عادل.. الطفل اللى نسى وجعه وقعد يطبطب عليا اول ما شافنى بعيط
لـ أشرف .. الطفل اللى افتكرت ان عمرنا ما هنتفق ودلوقتى بيحضنى اول ما يشوفنى
لـ ياسمين .. اللى خلت ماما تزعل منى اسبوع
لـ شوارع وسط البلد .. اللى فى عز زحمتها مليانة سكوت
لـ مسجد رابعة .. و الناس اللى بتخلينى ابتسم اول ما عيونها بتضحك
للـ حسين وشارع المُعز اللى سبت قلبى جوة كل ركن فيه
للـ سيدة زينب وصلاة الجمعة
لـ مصطفى عصام .. اكتر حد ضحكنى وبكانى .. و اول حد احضر عزاه
للـ كتب اللى نفسى اقراها
لـ شوارع الدقى اللى معرفش ليه بحبها
لأ حلامى اللى ضيعتها بإيدى
وليـا .. طول ما ربنا راضى عنى

كل مـرة همشـى عند الجامعة .. هفتكر الدم اللى سال على الأسفلت ..
المكـان اللى كان كله كتب وملازم و ورق وقهاوى و سندويتشات و ورق اعلانات مرمى على الارض .. والزحمة والناس اللى ماشية تخبط فى بعضيهـا .. اتحول لبركة دم !
هنسى شكلى وانا مش طايقة الناس اللى حواليا يوم التنسيق .. 
وهنسى شكلى انا وصحابى اول يوم لينا فى الجامعة والتوهة اللى كنا فيها واللخبطة .. 
وهفتكـر شكل الناس اللى ماتت !
مش هبتسم زى الاول اما بفتكر ذكرى اول يوم فى الجامعة .. 
هنسى الاسفلت اللى كان غرقان بورق الاعلانات والملازم .. وهفتكر الارض اللى كانت مليانة بفوارغ الرصاص وعلاماته اللى هتفضل موجودة فى الحيطان شاهده على اللى حصل !

مبابحبش اتكلم فى السياسة ..
من صُغرى واخرى مع السياسة هى الاخبـار اللى بسمعها فى الراديو قبل ما انزل المدرسة
والفقرة اللى بيقدمها "مصطفى بكرى " مش فاكرة اسمها بالظبط بس كان عامل فيها مُعارض !
كان عندى اعتقاد دائم ان "مبارك " هيفضل رئيس لحد ما اموت ..
يمكن عشان ماشوفتش رئيس غيره من ساعه ما اتولدت ! :D
ولا عمرى شوفت ابويا بيتكلم معايا فى اى شئ يتعلق بالبلد ..
كان يشترى الجرنان ويسيبهولى اقراه .. وكنت بحب الاخبار عشان مربع لهشام مبارك كان اسمه " احم احم "
وكان بيضحكنى جــداا
علاقتى بدأت مع متابعة الاحوال السياسية فى بلدنا من اول ما دخلت 2 ثانوى ..
وكان مدرس الانجلش بتاعى بيكره مبارك جدااااااا .. يمكن الكره اللى جواه لمبارك لو كان وزعه على الناس
كان كفيل انك تكره بيه حتى نفسك !
وكان مسميه رأس البقرة :D .. هو اللى عرفنى على عبد الحليم قنديل وقالى على اسامى كتب اقراها ليه
وفاكرة الفرحة اللى كانت على وشه اما لقى كتاب "الرئيس البديل " ايام ما كان ممنوع من النشر اصلا
و هو اللى خلانى اعرف مين هو " هشام الجخ " عشان كان بيحب قصيده جحا و3 خرفان
تقريبا هو اللى شكلى الوعى اللى عندى تجاه السياسة ..
بالفطرة كنت بحب جمال عبد الناصر ويوم ما جت سيرته قدامه ولقيته بيقول عليه زعيم الفساد !
تقريبا مانمتش يومها وكنت عايزة اعرف ليه قال عليه كده ؟!
لحد ما قالى على السيئات اللى كانت فى عهد عبد الناصر كانت ايه ..
وعشان كنت بصدقه اوى يوم ما كان بابا بيقول على عبد الناصر قصيده شعر قولتله :
" على فكرة عبد الناصر كان عنده سيئات برضه ومكانش ملاك " !
بابا يومها قعد يقنع فيا ساعتين ان عبد الناصر سيئاته لا تُذكر قدام الحاجات الكويسة اللى عملها وانا برضه مُصممة على الموقف اللى مستر خالد قاله !
الراجل ده شكل فى فكرى حاجات كتيـــر جدا .. للأسف بابا عُمره ما اتكلم معايا حرفيـا عن اى حاجه !
اليومين دول بجد محتاجة شخص زى مستر خالد .. كان نفسى يبقى عندى جد او عم او خال حتى !
حد كبير يبقى قدوتى .. حد اسمعه وينصحنى ..
معرفش ليه اكتشفت ان الرجالة اللى فى حياتى دايما بيخذلونى !
ابويا عُمرنا ما كنا صحاب ومستعده اقايض حياتى قُصاد كلمة " بحبك " وحضن كبيــــــــــر منه !
و ولا عُمرى شوفت جدودى ولا ليا عم اروحله واشتكيله وخالى ابعد من السما ..
حتى الطفل اللى كنت متشعلقة بيه زمـان اما كبـر مباقاش يعرفنـى !

بتتوهم بالناس بسـرعـة , بس مش اى ناس ..
اللى بيخلوهـا تحس انها مش لوحدهـا , ناس بيشاركوهـا اللى بتمر بيه ,
ان سكوتهـا ده مش غريب , ان حُبها للحاجات دى برضه شئ عادى
انهـا مش جايـة من كوكب تـانى !
لو شافت ملامح مستخبيـة بتحاول تفك شفرتها وتفهمهـا ..
بتتـوه فى زحمـة النـاس , مُمكن المكان يبقى مليان كلام والدوشـة عالية بس هى مش سامعـة حاجة !
مركـزة مع وش بنى آدم وببتحاول تترجم اللى جوا عنيـه ,
بتتعاطف مع الناس بسهولـة , وممكن تتأر من اى شئ يلمس قلبها !
ومشكلتهـا انها بتحاول دايما تبيّن وش مش بتاعها .
صعـب جـدااا حد يفهمهـا , اصل ساعات هى مابتفهمهاش . .
لو الدنيـا ضاقت وملاقتش حد تشكيله همها , تدور على اقرب ورقة وقلم وتشكى بالحبر عالسطور . .
مُعجزة لو حد قالها انا كمان حاسس زيك . . وانتى عرفتى تقولى اللى كان نفسى اوصفه !
اصل الناس اللى بتوصف اللى جواها قليلين ,
مفيش غير كام واحد يتعدوا على صوابع ايدها , بتحاول على قد ما تقدر ماتسيبهمش :)
دايما كانـت بتتخيـل نفسهـا حد غيرهـا !
وتسأل نفسهـا " كان هيجرى حاجه لو كنت قريبة دى ولا اخت دة ؟! "
لو قلبهـا اتفتحت بيبانه عشان حد صعب يخرج منه !
اصلها مش بالساهل بتّسكن حد جواها . .
 مُمكن لو شافت حد لأول مرة وكان لُقاهم مجرد دقايق ,
بس فيهم حست من كلامه ان فيه حاجه غريبة او غامضة او فى عنيه ضى غريب لمس قلبها ,
بتفضل مش ناسياه وتسيبله مكان , جايز فى يوم يتقابلوا تانى .

ايوة انا الهبلة اللى كانت فاكرة ان دراستها اهم حاجة فى حياتها ..

وكنت بحلم باليوم اللى هدخل فيه “طب” ! يمكن عشان امى كانت دايما بتشجعنى عالمذاكرة وببتحبنى فيه , كنت بذاكر منغير ما القى سبب للمذاكرة ..

بس لأ .. كان عندى اسباب ! .. اصل المذاكرة هى اللى كانت بتخلى الناس تضحك فى وشى ..

منغير هزار , انا كنت مصدقة كده !

طول عمر المدرسين بيحبونى وبيشكروا فياا جدااااااااا لما بابا يسألهم “سارة ايه اخبار مذاكرتها ” ؟؟

كنت البنت اللى بتقعد فى الديسك الاول , وامينة الفصل , واول واحده بتخلص الامتحان , كنت عايشة فى دور حباه وافتكرت انه مصدر سعادتى !

طول 11 سنـة “حضانة وابتدائى واعدادى ” كنت فاكرة انى كده هكسب رضا امى والناس ونفسى قبلهم !!

فى اعدادى بالذات كان عندى مدرسين اتعلقت بيهم جدا , كانوا قدوتى فى كل حاجه , اللى يقولوا عليه بيتنفذ منغير تفكير !

كنت شايفة حلمى بيقرب وانى خلاص هلمسه , وفعـــــــــلا . . 

فى اولى اعدادى كنت التالتة عالمدرسة وفى تانية اعدادى كان ليا ترتيب برضه بس مش فاكراه وجت اخر سنـة فى اعدادى ” تقري اخر سنة ليا فى النجاح برضه ” ! .. وحققت جزء من الحلم ..

وبقيــت الاولـــــى على المدرسة , مش هقدر اوصف سعادتى وقتها , كان الحظ بيلعب معايا فى الوقت ده ,

كنت لسة واخده الحزام البنى وكنت شاطرة فى التمرين وكمان بقيت الاولى على مدرستــى !

ومن ساعتها وانا عمرى واقف عند 2007 ! .. افتكرت انى مسكت النجوم فى ايدى , ومن كتر حبى لـ 3 سنين اعدادى ومن كتر تعلقى بيها كنت مُغرمة بكل تفاصيلها من اول المبنى وفصوله حتى السلم ياما شهد على ذكريات حلوة ليا انا وصحابى :) .. وصولا بالمدرسين !

عشقت تفاصيل السنين دى , لدرجة انى يوم مادخلت ثانوى كنت مابصدق الفسحة تيجى واروح اقعد فى المبنى التانى !! .. وكنت بعيط لماما عشان ما اروحش المدرسة ساعات !!

فكرة انى سبت المبنى اللى شاف نجاحى كانت بالنسبة ليا مخيفة ! , مرت اولى ثانوى كأنها سنتين , 

وجت 2 ثانوى !

السنـة اللى بحلم تتمحى من حياتى ! .. دخلت علمى وافتكرت انى ممكن احقق حلمى وابقى دكتورة زى ما اتمنيت طول عمرى , او ماما اتمنت طول عمرها مش فارقة !

بس حلم طب اختفى واتحول لكلية علوم .. وتأتى الرياح بما لا تشتهى السفن دايما معرفش ليه ؟! :D

مرت 2 ثانوى اللى هى “2009 \ 2010 ” واتحولت لأنسانة ماعرفهاش وبحاول على قد ما اقدر ما افتكرهاش !

كانت بداية تمرد بنوتة صغيرة كل اللى بيفرحها فى حياتها مذاكرتها , وبدأت اكره المذاكرة واكره

المدرسة اكتـر حاولت افهم ليه كل ده واكتشفت انه كان ” عند ” !! ..ايوة كان عند 

عند عشان امى بتحبنى اذاكر يبقى مش مذاكرة , عند عشان كل الناس مش شايفة حاجه بعملها صح غير المذاكرة طب برضه مش هذاكر !!

بس عندى ماورثنيش الكفر على قد ما ورثنى الفشل !

اتمنيت الموت كتيـر بس فى كل مرة ربنا كان بيقولى ده مش معادك ! .. مش انتى اللى هتحددى معاد موتك !

مستر الكيميا كان بيسمع عنى كتيــر انى شاطرة وبحب المذاكرة وكان بيستغرب ! .. اما حد كان بيقوله كده كان يرد ” انت بتتكلم على سارة سيد ” ؟؟

يوم المراجعه بصلى وعمرى ماهنسى نظرته يومها فى حياتـى ! .. مكانش عارف يعمل ايه غير انه قالى ربنا معاكى . . كمية لا مبالاة فى عنيا معرفش يعمل ايه قصادها !

ويوم النتيجة مالقتش غير 74 % صافى اكتئاب ووحدة وتمرد وغباء وجهل !

مافوقتش من الغيبوبة الا يوم ما التنسيق قالى ” استنفذ الطالب رغباته ” .. بمجموع كُلى 82 % !

وبعد محاولات كتيرة ملاقتش غير التعليم المفتوح ادخله ! ..وسيبكوا من نكسة الثانوية العامة المفتوح ده وكسة من نوع اخر ! :D

اول سنة فكرت اسيب الجامعه اكتر من مرة , صدعت دماغ ناس كتيــــــــرة وقرفتهم بمشاكلى طول الـ 3 سنين اللى فاتوا دول وبصراحة خرجونى كتير من اللى انا فيه .. بس برضه محدش قدر يفهم ايه اللى انا فيه حرفيا وايه اللى جوايا !

سنة اولى وخلاصة قرفها واكتئابها والتقدير كان مقبول ! :D

بقالى سنتين فى الجامعة وعمرى ما حسيت انى طالبة جامعية الا فى اواخر التيرم الحالى  !

خلاصة كل ده , انا كنت بعمل حاجه وانا مبافكرش انا بعملها ليه ؟! ” اللى هى المذاكرة ” .. ولما عندت  ملاقيتش غير الفشل !

فكــــــر كتيـــــــر قبل ما تبص لقدام , وفكر قبل ماتعمل اى حاجه فى حياتك واسأل نفسك على السبب .. اتمسك بأحلامك للأخر وما تزعلش لو ربنا حطك فى مكان مش شايف نفسك فيه .. يمكن يبقى مخرج لطريق احلامك :)

ربنا حطنى فى المكان ده لسبب هو عارفه , مش هعترض تانى ومش هكتأب تانى ومش هقول غير الحمد لله .

حوار بين طفلين قاعدين فى الكرسى اللى ورايا فى الاتوبيس :
"كانوا قاعدين هما الـ 2 على كرسى واحد ومش عارفين يقعدوا "

- احمد تخيل كده الاتوبيس ده كله فـــــــااااااااااااااضى وكل واحد فينا قاعده على كرسى !
- الله هبقى قاعد مستريح احسن من القعده الزفت دى
-عيب لحسن ماما تسمعك
- حاضر . .
-طب لو الاتوبيس اتملى وطلع راجل عجوز ومالوش مكان هتعمل ايه ؟!
- هقوم وهقعده ! .. عشان ماما قالتلى انناا لازم نعطف على الناس الكبار
- طب لو راجل وست عواجيز ومفيش غير كرسى واحد ؟!
- !!!! هقعد الست العجوزة عشان حرام تقف والراجل المفروض يستحمل اكتر . .
بس يا ذكى ممكن نقعدهم هما الاتنين !
- ازاى يعنى ؟!
-هتقوم تقف معايا ونقعدهم ؟!
-لا مش هقف !
- ياسلام وهتسيب حد فيهم واقف ؟!
- لا هخلى الست العجوزة تقعد واقعد على رجلها و اخليها تحضنى عشان انا عمرى ما شوفت جدتى ونفسى اجرب حضنها !

أعرف ذلك الشعور جيـدا . . راودنى اكثر من مرة . .
فـ المرة الأولى الذى شعرت هكذا من قبل كان قبل ان أحلم بجارنـا العجوز الذى كنت اعتبره مثل جدى . .
كان يروى لى حكايات عن القاهرة قديما , واهل النوبة والصعيد وحى الزمالك وجمال شوارعه . .

" كان بيننا لوح خشبى طويل لا أرى نهايتـه , وبجانبه شخصان يمسكون يده , ابتسم لى من دون كلمات ورحل " !
استيقظت فى ذلك اليـوم على صوت امى وهى تقول لأبى : " ابو احمد جارنا مـات " !
شعرت بالخوف ولم اخبر احدا بحلمـى , لا أدرى السبب , ربما الخوف كان احد الاسبلب ,
او تفسيرات البعض التى سترعبنى اكثر !
مرت الايـام لأجد نفسـى أحلم بطيب العيـون الذى اذهب اليه منذ ان كنت فى الصف الرابع الابتدائى ,
ذلك الشخص الذى لا تمل من حكاياته ايضا . . على وجهه ما يطلقون عليه " رضا ونور من ربنـا " :)
حافظ للقرءان عن ظهر قلب , تشعر معه براحة غريبة , لكن حلمه كان مختلف عن حلم جارنا العجوز . .
استيظت وانا اشكو من عينى لأجبر امى ان  تتصل بالعيادة وتسأل على مواعيده لأذهب اليه ,
 لكن لم يجب أحد ! . . يوم تلو الاخر ولا احد يرد ! . . الى ان رفع احدهم سماعه الهاتف اخيرا مُخبرا امى ان الدكتور مريض وسيعود للعياده بعد شهر !
احتل الخوف اركان قلبى , لماذا هؤلاء الاشخاص تحديدا ؟!
حاولت نسيان احلامى لكنها تكررت مع اشخاص كثيرة , منهم من اعرفه عن ظهر قلب واحزن عند سماع خبر وفاته ,
ومنهم من رأيته مرة واحدة لكنه احتل مكانة فى قلبى , واعرف صدفة بوفاته او انه مريض !
مع كل حلم يراودنى شعور انى اختنق . . ان روحى تتعذب بالداخل . . لا يوجد سبب واضح لحزنـى لكنى حزينـة .
الى ان وبدون مقدمات استيقظت ذات يوم وانا فى حالة مزرية , تفاصيل حلم غير واضحة واشخاص تجرى واصوات لم احددها !
مرت الساعات مثل السنـة , امى فعلت كل شئ لمحو ذلك التجهم عن وجهى لكن بدون فائدة . .
لأجد جرس الهاتف يرن , ردت امى لتجد صديق ابى فى العمل يقول لها وبدون مقدمات :
"شدى حيلك , جوزك عمل حادثة وهو جاى فى الطريق " !

انـا كوكب ماشى لوحده ومافيش للوحده حدود ,
وهسيب تليفـونى يرن . . انا اصلا من موجود !

عمالة ابص على السطرين دول وأفكر !
هو انا فعلا لوحـدى ؟! ادور حواليـا ما الاقيش غير الهـوا . .
عمـال يبعتـر شعرى يمين وشمـال , ويطير الورق اللى حاطاه قدامى . .
ابص عالورق وهو طايـر فى الهوا , نفسى اقوم وألمُه , بس مش عارفـة اتحرك !
رجليـا مش عايـزة تسمع كلامى , ولا إيدى قادرة تمسك كوبايـة الشـاى اللى بردت قدامى . .
ولا حتـى عارفت أمدهـا اغير الأغنيـة اللى شغالة دى ,
"اغنيـة سخيفـة :@ "
انزل عينـى من السما وابص تانى على السطريـن . .
هو فعلا وحدتـى مالهاش حدود ؟؟!
افكر وافكر وافكر ,
واكتشف ان انا بتـوه من نفسـى كتيـر , كتير بتغرب جوايـا ,
ساعات بحس ان قلبى مش بتاعـى !
"بس بس بس انتى زى الفل يا جيرمين , بلاش فلسفة الله يخليكى ! "
غصب عنى عينـى ترجع على السطرين لتالت مرة ,
وهسيب تليفونى يـرن !
آآه صح , تليفونى !!
الاقى 16 مكالمة لم يرد عليهـا !!
يــــــــــــاااه للدرجة دى انا مُهمة دة انا ساعات ببقى نفسى اسمعلك صوت ومابترنش !
ادور عالأسامى اللى اتصلت واسرح , واحط التليفون من سكـات . .
ما هو اصلا كنت هرد اقول ايه ؟!
اسألتهتم سخيفة ورخمـة , ومش عايـزة ابرر لحد الكآبة اللى جوايـا . .
عشـان عارفه ان الدنيـا ربيع , والحياة حلـوة بس نفهمـها ,
وبكرة تروق وتحلى والكلام الخايب دة :|
احسن انى ماردتش عليهم
وبعدين هما لسة فاكريـن يسألوا ؟!
صوت جوايا يرد " يابنتى كل واحد ليه ظروفه , اعذرى الناس معلش "
ارد انا " طيـــب " !

انا اصلا مش موجـود . . ممممممممم هو انا فعلا هنـا ؟!
ايـــــــووووووة الجنـان بدأ . .
يابنتـى ما انتى مرزوعـة بقالك .....
يـيجـى ......
من الساعة .........
مش عارفة !
ابحلـق فى الساعـة الاقيها 2 بالليل !
يعنى انا بقالى 5 ساعات متنحة و محدش فكر يدخل يشوف مالى ؟!
ألم حاجتـى واقفل البلكـونـة واقرر انـام . .
"ليدور بداخل رأسى حوار اشبه بما دار طوال الـ 5 ساعات الماضيـة "
لأجد النوم يشوفله مكان تانى ينام فيه بعيد عنى ! :D

دايمـا معلمة قلبـى الادب , مابسمعش كلامه مهما قال ,
مهما اتعلق بـ ده ولا حتى بـ دى !
ما اتعودتـش اثق فى حد , اى حد يدخل حياتـى جديد بخلى دايما بينـا مسافة على قد ما اقـدر ,
عمرى ما جازفـت بقلبـى وخليتـه يثق فى حد , بخاف عليه يتوجع !
صُحابـى كلهم معايـا من زمـان , اللى مابينـا عُمر ,
حافظيـن بعض , معايا من حضانة وابتدائى واعدادى وثانوى ,
فى المدة دى كنا بنبعد عن بعض فتـرات , بس دايما بنلجأ لبعض فى اى شئ ,
مش محتاجين شفايفنا تقول كلام عشان نفهم بعض ,
كفايـة نظرة عنينا :)
دخلنـا مع بعض الجامعـة , نفس الأيـام واوقات المحاضرات ,
ونفس الكسل والتزويغ من المحاضرات :D
جوايا حتـة منهم وجوة كل واحده فيهم حتـة منـى :)
كتيـر بنختلف بس دايما بنرجع بمجرد نظرة عنينا :)
يمكن كل الاسبـاب دى هى اللى خلت قلبى مقفول على نفسـه ,
عمـره ما سلم نفسـه لأى حد دق بابُه ,
قلبى عرف الحب من طبطبة ايد امى وحُضنها الدافـى ,
وعيـون بابا اللى دايما مليانة كلام بفهمه ,
وضحكة اخواتـى اللى مالية حياتـى حُب :)
وتهييس صُحابى وصوت ضحكتهم اللى بتخلى قلبى يضحك :)
وتكشيرتهم ودموعهم اللى بتخلـى حتت من قلبى تتبخر فى السما !
وروحى لما بتتخنق اما حد فيهم يبقى عنده مشكلـة . .
دول هُما اللى سمحتلهم يسكنوا قلبى وكانوا اهل ثقة , عاشوا فى قلبى مع حلم قديم ,
بس خلاص صحيت منه , كانت مأساة فى شكل حلم !
حلم عيشته بس مش فاكرة منه دلوقتى غير تناتيش . .
اعتراف ولد يادوب عنده عشر سنين لبنت اصغر منه " أنه بيحبها " !
حلم كان عامل زى البلونة اللى متعلقة فى السمـا ,
بشريطة مربوطة فى ايدى , كنت فاكرة انها مصدر حريتـى ,
فضلت محافظة عليها زى روحى ,
مهما السما اتغطت بالغيوم والمطر ملاهـا !
كنت بعرف ازاى احافظ عليهـا , كتير من اللى حواليا كان نفسهم فى دبابيس ويفرقعوهـا !
بس محدش قدر , كان شكلها على مر السنين اللى فاتت بشع !
وكله كان شايف ده الا انا .
بس لما جه الوقـت اللى ماكانش ينفع تفضل الشريطة دى فى ايدى , حسيت قد ايه هى كانت مقيدانى ,
مقيده قلبى قبل ايدى ,
قررت اجيب مقص واسيبها تطير , ما خلاص بقـى ماينفعش اعيش اكتر من كده وانا متقيدة بيهـا . .
ماينفعش اتقيـد بحاجة خانقـة روحى , بصراحـة كان حلم حياتـى !
بس اتحـول لسجن , ويوم ما قررت اسيب الحلم حُر ,
لقيت نفسى السجين والسجـان !
حسيـــت بالحـريـــة لأول مـرة من كتيـر :)
فى الآخر يعنـى , انا فخورة بكل الناس اللى سكنت قلبـى ,
وفخورة اكتر بقلبـى , اللى عمره ما عذب نفسه بقصص نهايتها معروفة , عرفـت احافظ عليـه ,
ومتأكده ان هاييجى اليـو اللى قلبى هيفتـح فيه بيبانـه وهيبقى بيت لشخص يعيش جواه طول العُمـر ! :)

كتـاب مفتوح فجأة اتفتح ,
عمره ماشاف لحظة فرح
اتعلم حاجات كتير طلعـت غلط , وانكتب جواه بالحبر لحد ما طفح !
طفح كدب وقسوة , طفح مـ القلوب الناسية ,
اتعلم يحب الرصاص , لعله يشوف لحظة حنية
من استيكة تدغدغ احساسه , لو فـ يوم تانـى غٍلط
يمكن تتمسح بسهولة , بس معقولة ؟!
عمرها ما هتسيب فى يوم اثر ؟!

كنت فاكرة إنى مش هعرف انسـاك , إلا لو شوفت جنبك عروسة بطرحة !
وفى عينــك فرحـة . .
لكن انا كنت غلط
عشان انا نسيتـك يوم ما شوفت الفرحة فى عينك . .
وانا لابسة الطرحة لواحد تانى مكانش انت !

لسـة عايشة فى قصـة حصلـت من زمـان ,
عاايشـة كما الغريب ماهـوش عارف منتهـاه !
زى الغريـق مش لاقى حد بطوق نجاة
قررت كذا مـرة اقفل كتاب الحواديـت
بس اللى حصـل انى قفلـت على نفسى بـ 100 مفتـاح !
مسجـونة وبحفظ اللى عدى واللى راح
قلبى جـواه زحمة بس برضه مليـان برااح
براح يساع كل اللى راح واللى لسه وقته ماجاش
براح يساع كل اللى حب واللى مات واللى عاش
براح سكنه كتيـر زمان
قبل حضارة الانسان
من قبل ما نتولد ويكون قدرنا اننا مانتلاقاش !

11 / 3 / 2013 .

لا أعلم ما هـو السبب الذى يجعل أى انسـان مهما كانـت ظروفه , أن يتجـرد من انسـانيتـه ويتـرك طفله فى الطريـق ليواجـه المـوت وحـده !!

ألا يدرى أن الله شاهـد على ما فعـل ؟!

الا يوجد بـداخـل قلبـه "إن كـان يمتلك واحـدا " اى رحمة على ذلك المخـلوق الضعيـف الذى لا حـول له ولا قـوة ؟!

ليـس له ذنب إلا أن ابـواه لا يمتلكـان أى مشاعـر بداخلهـم !

لم اكن اعلـم عندمـا كنت طفلـة معنـى كلمـة "يتيم" , لم اقابـل احد منهـم ولم اتعامـل معهم ,

إلى ان ذهبـت ذات مرة إلى احد دور الايتـام . .

لم أعرف وقتهـا كيف اتصـرف , لا ادرى ماذا اصابنـى وقتهـا ؟؟

شعــــــرت بالعجـــــــز .

اعتقد كنا فى يوم عيـد , لكنـى لم ألعب معهم ولم يخاطب لسانـى احد منهم ,

فقط اكتفيـت بالنظر اليهـم وتحريـك رأسى بالموافقـة على اى شئ يقولونه ,

لم انم فى ذلك اليـوم , ولم اقتـرب من امـى فى ذلك اليـوم ايضا 

ظللت مستيقظـة دون ان اعرف السبب .

ذهبت لنفـس الدار عدة مرات وفى كل مـرة لم تتغيـر معاملتـى لهم , مثل اول مرة تماما 

لا ألعب , لا أتحرك , لا أتكلم , فقط اكتفـى بإيماء رأسى اشارة لـ "نعم" او "لا " !

وابتسـم .

عقلـى فى كل مـرة لا يستوعـب الفكـرة , فكرة النـوم و امى ليسـت بالغرفـة المجاورة !

هل يهتـم لأمرهم احد ؟! هل يشعـرون بالدفء ؟! هل يستيقظوا طوال الليل وهو يفكروا بأمهم التى لم يروهـا ؟!

حاولـت التفكيـر مثلهم وفشلت !

أعلم ان الله لا ينسى عبـاده , وان الله أخذ منهم حنـان والدتهم ودفء والدهـم و سيعوضهـم بما هو افضل منهم ,

وإن لم يكن , فسيعوضهـم فى الآخرة , وربمـا يلتقيهم لا أدرى ...

أعتـرف انى حزنت كثيـرا على هؤلاء الاولاد لكن من اكثر بؤسا منهم هم من لا يمتلكون حتى دار للأيتـام تأويهم !!

يسكنـون الشوارع ومصيـرهم لا يعلمه إلا الله ...

ما دفعنـى لكتابـة كل هذا وتحويلـه لأعتراف على ورق , هو ذلك الطفل !

لم يتجاوز العاشـرة بعـد , لكنك عندمـا تتحدث معه تشعـر وكأنك امام رجل كبيـر !

لا يتحدث إلا وكـان واثق من حديثـه , لا يقسـم بالله على شئ لا يستطيـع فعله ...

لا يعطـى وعـد إلا وكان متأكد من إنه سيفى به , ولن يخلف وعده ...

تمنيـت لو كـان أخى , أو يا ليتـه كان احد ابنائى !!

عينـاه تضحك عندما يتكلم , أحببته من كل قلبـى , ذكرنى بشخص كنت اعرفـه قديمـا اسمه " أنا " !

متميـز عن بقيـة الاولاد , ويشبهنـى كثيـرا عندما كنت طفلة 

"لا يشبـه الشخص الذى أنا عليه الآن " ...

دعـوت له كثيـرا أن يوفقه الله ويذهب به لبـر أمان "مثلما تقول أمى " ويكون من انجح النـاس واحسنهم خلقـا ! :)

أكتشفـت اكتشـاف مذهل ,
بحب اتـوه ف الزحمة آآه , بس بيجيلـى أكتئاب منها !
مع الناس مش ببقـى براحتى ,
بحب النـاس , بس لازم وقتهم يبقى محدد فى حياتـى ,
اصلى فى الدوشـة بفكر كتيـر وبمارس هوايتـى المفضلة ,
ألا وهى " الفرجـة على وشوش النـاس " ,
بحب أشوف ملامحهم وانفعالاتهم وطريقة حركاتهم
وبزعل لما بشوف ملامح شخص حزين , وانا اصلا مش ناقصة !
اصلى بخترع اى سبب للأكتئاب ,
وبما ان وشوش النـاس بقت دايمـا حزينـة فبلاش أمارس هوايتـى لفتـرة
يا إما وشوشهم تتعلم تضحـك , يا اما ابطل دى هوايـة
او اختـار الحل الاسهـل , ابقى لوحـدى :(

أتعرف ذلك الشعـور الذى يجعـلك تحلـق خارج روحـك ؟!

تشعر وكأنك فراشـة صغيـرة تحمـلها الريـاح مثلما تشـاء . .
غيـر مهتم بالإتجـاه , ولا المكـان , ولا إلى اين ستحمـلك خطواتـك !
تظل روحـك معلقـة خـارج جسـدك لا تعرف وجهتهـا . .
مستمتعـة بالضياع , غير مباليـة لأى معنى فى حياتـك . .
تشعر بخفـة روحـك وهى تتمايـل يمينـا ويسـارا , وكأن لها قدمـان حافيتـان تلامسـان الارض وتشعران بالاستمتـاع لبرودتهـا !
يضفى البـرد شيئـا من الاستمتـاع المخلوط الحريـة . .
وقتهـا فليغضـب من يغضـب وليعاتب من يعاتب
فروحـك وعقلك وقلبك اتفقـوا على شـئ واحد , لا يعرفـون غيره ,
اتفقـوا على ألا يختلفوا "ولو للحظـات " !
تطل بروحـك لترى جسـدك الذى يأويك وهـو هائـم فى عالـم ليس موجود سوى فى خيـالك !
تتمنـى لو تمطـر السمـاء لتكتمـل الصورة :)
تشعر وكأن عمـرك لم يتجـاوز العاشـرة , وقلبـك ليس به ضغائـن لأحد . .
فقـرر أن يسامـح كل من أساءوا له ويبتسـم :)
وقـرر عقلك أن يُبـرم معاهـده مع قلبـك لوقف اطـلاق الاتهامـات " ايضا ولو للحظات " !
فيصبـح كل ما بك مبتسـم , مُحلق , يشعر وكأنه فراشـة ! :)

عرفت إنى مش هعـرف أعيش فى الدنيـا لوحـدى !
عشـان عنـدى صحـاب .. خلونـى إستحـالة أفكر " مجرد تفكيـر " إنى اصحـى
والاقى نفسـى لوحدى وهمـا مش معايـا .. !
كان الاول .. كل اللى بتمنـاه إنى ابقـى عايشـة منغيـر نـاس ..
عشـان لا أسمع كلام يضايـق ولا حتـى فعل يِزَعل !
بس بعـد كدة عرفـت إنى كنت عبيطـة !!
أصلهم بقـوا جزء من حيـاتى ..بدعى ربنـا كل يـوم إنهم يفضلـوا معايـا على طــوول :)
منهم اللى استحملنـى كتيــــــــــر .. واستحمـلوا " زنـى وترددى وتسـرعى دايمـا "
ومنهم اللى استحملنـى آآه .. بس ماكانش عنـده قوة تحمـل ليا !
ومع أول غلط عملـته ومنغيـر قصـد .. سابونـى ومشيـوا !
بس فى نـاس مامشيتـش .. بس وجودهـم بقى زى عـدمه !
يمكـن كانـوا مشيوا اسهل ..
وجودهـم بقى سد خانة وفاكرنى مش فاهمـة
وعايـزنى اصدق إن نبـرة صوتهم دى طبيعيــة .. ونظراتهم اللى مليانة عتـاب دى برضه طبيبعية !
وكل ما اسأل عن السـبب .. ملاقيش رد غيــر " مفيش حاجــة "
طب وأنا كمـان مفيش حاجة .. ومش هسأل تانى بعد كده
عشـان قلـة السؤال كان اسهل عليـا ..